1315 März 2. Brieg

Herzog Boleslaw verzichtet auf die Errichtung neuer Fleischbänke in Brieg.

In nomine domini amen. Nos Bolezlaus dei gracia dux Slezie et dominus Legnicensis universis tam presentibus quam futuris hujus pagine testimonio cupimus fore notum, quod cum ex consilio quorundam nostrorum fidelium quedam maccella carnium in civitate nostra Bregensi de novo construere et edificare vellemus, venientes ad nostram presenciam consules eiusdem civitatis nostre una cum eorum concivibus et carnificibus habentibus maccella nos humiliter petiverunt, ut a tali edificatione cessare de nostra clemencia dignaremur informantes etiam nos, quod magnum esset dampnum et prejudicium civitatis, et ut nos ab huiusmodi proposito revocarent, ipsi cives habentes maccella una cum carnificibus nobis octuaginta marcas denariorum grossorum pro eo sponte et voluntarie donaverunt. Nos itaque eorum iustis peticionibus inclinati, et ne dicta ciuitas nostra ex aliquali nova edificatione maccellorum dampnum aliquod aut periculum in posterum paciatur, predictis nostris consulibus et universis civibus habentibus maccella seu eciam carnificibus bona fide promittimus in hiis scriptis, quod nos et nostri heredes aut posteri in dicta civitate nostra Bregensi nunquam in perpetuum aliqua maccella de novo supra illa, que nunc ibidem sunt, aut in gravamen eorum edificare vel exstruere aliqualiter debeamus volentes, quod predicti cives nostri habentes propria maccella filios vel heredes eorum scientes vel nescientes opus carnificum mediantibus famulis, qui ipsos in empiono et vendicione informent sine inpedimento quolibet in propria maccella possint statuere et locare; licebit eciam eosdem praedicta eorum maccella sine inpedimento aliorum carnificum libere exponere notis et extraneis aut quibuscunque ipsis placuit, dummodo tales sint, qui opus sciant carnificum et se honeste rexerint et decenter. In cuius rei testimonium et evidenciam pleniorem presentes literas scribi et nostri sigilli munimine fecimus roborari. Actum et datum in Brega dominica die, qua cantatur letare, anno domini millesimo tricentesimo decimo quinto presentibus Henczschone de Marschowicz, Thammone Quaz, Vincencio de Schiltberg militibus, Johanne de Schiltberg, judice curie nostre Bregensis, Hildebrando advocato hereditario ibidem, Nicolao de Jegerdorff et Heimanno de Bytschin consulibus civitatis Bregensis et Gisilhero notario nostro, per quem presentia sunt conscripta.

An rothseidener Schnur das Siegel des Herzogs wie bei No. XI.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 9, Urkunden der Stadt Brieg. Urkundliche und chronikalische nachrichten über die Stadt Brieg, die dortigen Klöster, die Stadt- und Stiftsgüter bis zum Jahre 1550. Hrsg Dr. C. Grünhagen, Breslau 1870.